ETA KITTO
Armeria Eskolak Ikastenen Esperientzia Eskolaren 19. promozioko ikasleak jaso ditu gaur goizean, ikasturte berriari hasiera emanez. Aurten, Ondarroako, Elgoibarko, Ermuko eta, batez ere, Eibarko 19 emakumek eta 5 gizonek hartuko dute parte. Horrela, urte hauetan 404 lagun pasa dira Esperientzia Eskolatik.
Ikasturtean askotariko gaiak jorratzen dira; hala nola, hauek: komunikazio-trebetasunak, osasun fisikoari eusteko eta berori hobetzeko ezagutzak, psikologia, literatura, kulturartekotasuna, zuzenbidea eta zuzenbideak bizitzan duen ezarpena, sexualitatea, filosofia, nutrizioa, historia, artea, musika, parte-hartzea, eta abar. Gainera, ikasleek proiektu sozial bat diseinatu eta garatzea da Eskolaren zati garrantzitsu bat. Eta, horretaz gain, kultur jarduerak egiten dira; adibidez, ibilaldiak eta bisita gidatuak.
Esperientziaren Eskolak erretiro aurreko etapan edota erretiroan dauden 50 urtetik gorako gizon-emakumeak elkartu nahi ditu, nolabaiteko kezka kultural eta sozialak dauzkatenak eta lan-garaian denbora-faltagatik edo beste arrazoi batzuengatik egin ezin izan zituzten jarduerak sakontzeko eta garatzeko gogoa dutenak. Horrela, parte-hartzaileen garapen pertsonal, osasungarri eta trebea sustatzea, prestakuntza eta ikaskuntza etengabea sustatzea, eta kolektibo horrek rol aktibo eta gogobetekoa edukiz gizartean eragin dezan laguntzea dira helburuak.