LABI: gaueko aisialdia 03:00ak arte, %50eko edukierarekin eta dantza egiteko aukerarekin

Labik bilera egin du gaur goizean eta koronabirusaren pandemiari aurre egiteko neurriak leuntzea erabaki du, azken asteotan egoera hobetu ondoren. Horrela, hartutako neurrien artean, gaueko aisialdia 03:00ak arte egon ahal izango da zabalik, edukiera %50ekoa izan daiteke gehienez, dantzalekuak ireki ahal izango dituzte (maskarekin bakarrik erabili ahal izango dira) eta barruko mahaietan 8 lagun elkartu ahal izango dira. Hala ere, ezin izango da barran edo zutik kontsumitu.

Ostalaritzari dagokionez, bestetik, edukiera %75ra igoko da barnealdean, barran edo zutik kontsumitzeko debekuari eutsiko zaio, eta mahaietan 8 lagun elkartu ahal izango dira barnealdean, eta 12 kanpoan. "Elkarte gastronomikoek antzeko baldintzak jarraituko dituzte", Gotzone Sagardui Osasun sailburuaren berbetan.

Neurriak bihar sartuko dira indarrean.