Asteburu honetan hasiko dira Santa Kurutz jaiak ospatzen, Ixuan egingo den bertso afariarekin

Asteburu honetan hasiko dira Santa Kurutz jaiak ospatzen, Ixuan egingo den bertso afariarekin
2023/04/24 eta kitto!
Asteburu honetan hasiko dira Santa Kurutz jaiak Ixua jatetxean egingo den bertso afariarekin. 19:00etan poteo musikatuari ekingo diote Untzagan, eta 20:30ean irtengo da autobusa udaletxe aurretik Ixuaruntz. 21:00etan hasiko da afaria honako bertsolarien parte-hartzearekin: JULIO SOTO, BEÑAT GAZTELUMENDI eta IKER ZUBELDIA.

Hurrengo astean, maiatzaren 3an (asteazkena), izango da Santa Kurutz eguna. Ospakizuna kanpai-jotzerarekin hasiko da 17:30ean, eta ondoren, 18:00etan, meza egongo da Santa Kurutzeko ermitan Gorosta eta Mandiola auzoetan hildakoen alde.

Maiatzaren 6an, zapatuan,  11:00etako mezaren ondoren hamaiketakoa egingo da, Oier Balzola eta Unai Andonegi trikitilariek eta Usartza txistulariek girotua. 12:30ean haurrentzako jolasak hasiko dira eta 13:00etan herri kirolen txanda izango da Karmele Gisasola, Uxue Ansorregi, Julen Kañamares eta Ibai Soroarekin. 14:30ean bazkaria egingo da Ixua jatetxean eta, ondoren, erromeria hasiko da, Oier Balzolak eta Unai Andonegik alaitua. Egunari amaiera emateko, 19:30ean  esku-pilota lehiaketa hartuko du Arrateko frontoiak (barruska). Txapeldunak saria izango du.

Maiatzaren 7an, domekan, Santa Kurutzera igoera  egingo da Urkizuko iturritik 9:45etik aurrera. Saria zozketatuko da parte hartzaile guztien artean. Izen-ematea 09:30ean egin ahal izango da  Urkizuko iturrian. Kanpai-jotzeraren ostean, 11:00etan meza nagusia ospatuko da Santa Kurutzeko ermitan. Hurbiltzen diren guztientzat piskolabisa egongo da, trikitilariek girotua. 12:30ean Potx magoak ikusizuna eskainiko du eta 13:00etan txapel-jaurtiketa egingo dute nahi duten guztiek.14:30ean kanpai hotsez bukatuko dira aurtengo jaiak.

jaixetakua2023