Andoni Mayo eta Dexter nagusi Salamancan jokatutako txakur-kros proban

Andoni Mayo eta Dexter nagusi Salamancan jokatutako txakur-kros proban
2023/01/31 eta kitto!
Azken asteburuan bi probetan hartu zuten parte gure herriko txakurkroslariek. Batetik, Unai Fernandezek eta “Dunkan” bere txakurrak Zumaian jokatutako Euskal Txakurkros Ligako zortzigarren jardunaldian hartu zuten parte, antolatzaileek prestatutako 8 kilometroko ibilbidea osatuz. Eibarko bikotea hirugarren postuan helmugaratu zen eta, horrela, Ligako sailkapenean ere hirugarren postu horri eusten diote. Euskadiko Txakurkros Liga amaitzeko bi proba geratzen dira bakarrik: domekan Zierbenan jokatuko dena eta hurrengo asteburuan (otsailak 11/12) Hondarribian egingo dena.

Bestalde, Andoni Mayo “Dexter” txakurrarekin eta Sonia Dominguez “Zeus”-ekin Salamancara gerturatu ziren, bertan antolatutako bi etapako lasterketan parte hartzeko. Zapatu gauean eta domeka goizean, bietan ibilbide berarekin, nagusi izan zen Mayo-Dexter bikotea, horrela garaipena gurera ekartzeko. Bizkorrenen artean izan zen baita Dominguez-Zeus bikotea, azken sailkapenean laugarren amaitzeko.