ETA KITTO
Urteko lehen kontzertua eskainiko du zapatuan Eibarko Musika Bandak eta berritasunekin itzuliko da gainera. Izan ere, “sekula egin ez dugun kontzertu-mota eskainiko dugu”, Andoni Vazquez zuzendariaren berbetan.
Bandak Felipe Murillo ipuin-kontalari azpeitiarra izango du lagun Coliseoan, umeei zuzendutako kontzertua emateko asmoz. Horrela, bi ipuin musikatu eskainiko dituzte: ‘Non dago musika?’ eta ‘Tubby the tuba’.
Emanaldiaren ordutegia ere ez da ohikoa izango, saioa zapatu arratsaldean egingo baita, 17:00etan.
Sarrerak Kutxabank bitartez doan eskuratu daitezke dagoeneko.
