Maiatza goi mailako argazkiekin jantziko dute berriz ere Deporreko Argazki Taldekoek

Gaur arratsaldean aurkeztu dute Argazkilaritza Maiatzean Eibarko Klub Deportiboan. Maiatzaren 3tik aurrera 256 argazki ikusteko aukera izango dugu, egun horretan, 19:00etan zabalduko diren bederatzi erakusketatan: Portalean Jose Miguel Alba, Andres Indurain eta Luis Camacho argazkilarien lanak ikusteko aukera izango da; Topalekuan, Jose Ignacio de Castrorenak; El Ambigú eta Portalea tabernetan, Klub Deportiboko Argazkilaritza Taldeko kideenak; Klub Deportiboan, Argizaiola Saria; Untzagako Jubilatu Etxean, Nazioarteko Gipuzkoa Saria; eta El Corte Inglesean, Emilia Valenciarenak. “Goi mailako argazkiak” ikusteko aukera emango diguten erakusketekin batera, Klub Deportiboko Argazkilaritza Taldeak antolatu duen egitarauan beste jarduera batzuk ere badaude: maiatzaren 4an Gabriel Brau argazkilariak 8 orduko tailerra emango du Portalean (10:00-14:00 eta 16:00-20:00; 20 euro; izen-ematea argazkilaritza@deporeibar.com helbidean). Argazkilaritza rallya, berriz, beste batzuetan baino lehen, maiatzaren 12an izango da oraingoan, “Euskal Jaiarekin bat egiteko”. Eta Untzagan izaten den “Topaketak kalean” maiatzaren 25ean egingo da, 17:00etatik 21:00etara. Horrez gain, aurtengo egitaraua ekainaren 6ra arte luzatuko da, Fotogune-ren bitartez Harvey Wang argazkilari amerikarra gonbidatu dute eta. Arratsaldeko 19:00etatik 21:00etara pelikula eta hitzaldi-solasaldia esakiniko ditu Portalean. EGITARAU OSOA HEMEN.