Batzar Nagusiek Elgetako Intxortako lubakiak Kultur Ondasun gisa babestea onartu dute
Gipuzkoako Batzar Nagusiek aho batez onartu dute Elkarrekin Gipuzkoa taldeak aurkeztutako ebazpen-proposamena, Elgetako mendien inguruko Gerra Zibileko defentsa-espazio eta egiturak Babes Ertaineko Kultura Ondasun izendatzeko espedientea abiarazteko eskaera egiten duena. Ekimena Kalamua, Akondia, Arrate, Topinburu, Illordo eta Intxorta inguruko eremuetan dagoen ondare historikoa babestera bideratzen da.
Ebazpenaren bidez, Batzar Nagusiek Eusko Jaurlaritzari eskatu diote babes-espedientea lehenbailehen martxan jartzeko, eremu horietako balio historikoa eta memoria demokratikoa zaintzeko helburuarekin.
Bozketa aho batekoa izan da, eta talde guztiek babestu dute proposamena.
Eztabaidan, Elkarrekin Gipuzkoako ordezkari Mariví Eizaguirrek azpimarratu du ondare horren babesa “erresistentzia antifaxistaren balioa aitortzeko” modu bat dela, eta aldi berean, “bizikidetza demokratikoari eta bakeari ekarpen zuzena” egiten diola.
PSE-EEko ordezkari David De Miguel-ek Eusko Jaurlaritzari eskatu dio ebazpenaren izapidetzea lehenbailehen abiatzeko, azpimarratuz helburua ez dela iragana berriro irekitzea, baizik eta “gertatutakoa ezagutzea, berriz errepika ez dadin”.
EAJ-PNVko Ander Garay-k gogorarazi du aurten 90 urte betetzen direla frankisten Gipuzkoako sarreratik, eta adierazi du ondare horrek “gertuko memoria historikoa” gordetzen duela lurraldeko hainbat familiatan. Halaber, Intxorta 1937 elkartearen lana nabarmendu du, memoriaren zabalkundean egindako ekarpenagatik.
EH Bilduko Joxemari Carrerek, bere aldetik, azpimarratu du “iragana ezagutzea ezinbestekoa dela etorkizuna ulertzeko”, eta balioan jarri du “faxismoaren aurrean erresistentzia egin zutenen” oroimena.
Onartutako erabakiak babes instituzionala ematen dio ondare horren kontserbazioari eta balioan jartzeari, memoria historikoaren ikuspegitik.
