Blues Hotsak 2026 jaialdiak Debabarrena musikaz beteko du azaroan
Soraluzen erro sakonak dituen Blues Hotsak jaialdiak zortzigarren edizioa beteko du aurten. Debabarreneko musika-ziklo erreferente honek egitarau zabala eta askotarikoa prestatu du azaroaren 16tik 22ra bitartean, nazioarteko zein etxeko artista garrantzitsuenen emanaldiak bilduz.
Asteazkenetik igandera bitartean, besteak beste, Dr. Feelgood talde britainiar aitzindaria, La Perra Blanco andaluziarra, AEBetako DeRobert & The Half-Truths souleroa, eta Barrence Whitfield & MFC Chicken izango dira ikusgai. Horrez gain, Petti, Ana Galarraga, Joan Pau Cumellas edota Paul San Martin bezalako euskal eta kataluniar artistak igoko dira agertokietara.
Jaialdiak, noski, musika baino gehiago eskainiko du: zine emanaldiak (The Commitments filma), literatur solasaldiak, gazte zein helduentzako harmonika ikastaroak, Karakatera irteera eta mendi gaineko musika jaia, eta familientzako zein argazkizaleentzako ekintzak ere antolatu dira.
Eibarko geltoki berezia
Gurean, Eibarren, jaialdiaren atariko emanaldi bikaina izateko zortea izango dugu. Azaroaren 13an, ostirala, arratsaldeko 19:00etan, Eibarko Coliseo Antzokiak jaialdiaren aurre-iragarki gisa antolatutako kontzertu guztiz berezia hartuko du: Lagunak Sessions (Catalunya Harmonica Summit).
Greg Izor ekoizle estatubatuarrak gidatutako egitasmo honetan, estatuko harmonika-jole eta musikari onenetako batzuk bildu dira disko berria aurkezteko: Little Jordi, Johnny Big Stone, Sweet Marta, Oscar Rabadan, M.A. Lonesome, David Sanchez eta Victor Puertas kataluniarrei Javier Laguna arrasatearra elkartuko zaie. Talde osatua zuzenean entzuteko aukera bakarra izango da hau, beraz, eibartarrentzat nahitaezko hitzordua izango da Coliseon.
Informazio gehiago eta kontzertuetarako sarrerak eskuratzeko, bisitatu Blues Hotsak-en webgune ofiziala.


