Errigoraren udazkeneko saskiak eskatzeko epea azaroaren 12ra arte egongo da zabalik
Errigorak 'Euskarari puzka' udazkeneko kanpaina abiatu du, Nafarroa erdialdeko eta hegoaldeko euskalgintza eta lehen sektorea indartzeko helburuarekin. Urriaren 22tik azaroaren 12ra arte, eskualde horretako produktuekin osatutako saskiak eskatu ahal izango dira. Aurtengo kanpainaren leloa «Auzolanean euskara sustraitik espaziora» da.
Hiru saski mota aukeratu ahal izango dira: beltza, 60 euroan; berdea, produktu ekologikoekin osatua, 65 euroan; eta gorria, 75 euroan. Besteak beste, olioa, piperrak, zainzuriak, orburuak, lekaleak, ardoa eta bestelako tokiko produktuak dituzte. Saskien edukia kolorearen arabera aldatzen da.
Kanpainaren bidez bildutakoaren zati bat Nafarroa erdialdeko eta hegoaldeko euskalgintza indartzera bideratuko dute. Errigoraren arabera, helburua da euskarak eremu horretan sustraiak sendotzen jarraitzea, auzolana eta elkartasuna oinarri hartuta. Horretarako, tokiko ekoizleen lana eta euskararen aldeko eragileen jarduna lotzen ditu ekimenak.
Saskiak errigora.eus webgunean eskatu daitezke, baita paperezko eskuorrien bidez ere. Eskaerak azaroaren 12ra arte egin ahal izango dira, eta banaketa azaroaren amaieran edo abenduaren hasieran egingo dute, erosle bakoitzak aukeratutako herriko bilketa-gunean eta ordutegian.
Ibaialde Ikastolari laguntzeko egutegia
Kanpainarekin batera, Euskararen haziak ereiten egutegia ere salgai jarri dute, 10 euroan. Egutegiaren orriak landatzeko modukoak dira, eta saldutako ale bakoitzeko bost euro zuzenean Lodosako Ibaialde Ikastolari emango dizkiote.
Ikastolak hamarkadak daramatza Erriberako goi aldean euskarari sustraiak emateko lanean. Hala ere, Nafarroako Hezkuntza Departamentuaren erabakiek ikastolaren bideragarritasuna zaildu dute. Egutegiaren salmentaren bidez, haren jarduna babestu eta euskararen hazia ereiten jarraitu nahi dute.
Kanpainaren inguruko dokumentala
Errigoraren kanpainaren ibilbidea ezagutzeko, 'Sustraitik Espaziora' dokumentala ere hainbat herri eta auzotan ikusi ahal izango da kanpainak irauten duen bitartean. Proiekzioen inguruko informazioa Errigoraren sare sozialetan emango dute.
2013an egin zuten lehen aldiz 'Euskarari puzka' kanpaina, Nafarroako hegoaldeko euskalgintzaren egoera zailari erantzuteko eta Euskal Herriko lurraldeen arteko loturak sendotzeko asmoz. Ordutik, tokiko produktuak, euskara eta auzolana uztartzen dituen ekimenaren bidez, elkartasun-sareak eraikitzen eta Ager eremuko euskalgintza indartzen jarraitu dute.

