JON ALONSO: “Musikaz gain, beti eduki dut antzerki grina piztuta”

Txiki-txikitatik dihardu musika munduan. Egiten duenarekiko maitasunari talentua gehitu dio eman dituen pausu guztietan. Bere ahotsaren oihartzunak hainbat leiho zabaltzeko aukera eman dio eta orain atea irekitzeko ordua iritsi zaio. Ondo apuntatu: Jon Alonsok bere proiektu pertsonala aurkeztuko du apirilaren 4an, Coliseo antzokian.

Atea Irekiz deitzen da Jon Alonsoren proiektua. Izen eta abizenarekin, bera den moduan azaltzen delako eszenatoki gainean. Dena dela, oholtzan ez da bakarrik egongo, bere ibilbidean garrantzitsuak izan diren artista eta lagunak egongo baitira. Sarrerak gaur bertan jarri dituzte salgai Kutxabank bitartez eta Coliseoko leihatilan.

Apirilaren 4an atea irekiko duzu, eta nola gainera! Demaseko ikuskizuna prestatu duzue.

Beti eduki izan dut bakarlari moduan proiektu bat garatzeko gogoa, baina ETB-ko Ztanda saioan sartu arte eta publikoaren erantzuna eta ni neu eszenatoki gainean nola sentitzen nintzen ikusi arte ez dut aurrerapausoa eman. Gabonen ostean ideia piztu zen, Udalarekin berba egiten hasi nintzen eta apirilean ikuskizuna eskaintzea zehaztu genuen. Gainera, jende pila bat dabil proiektuan eta horrelakoetan zaila da denontzat ona den data bat zehaztea, baina planetak lerrokatu egin dira. Neure burua bakarlari bezala aurkeztuko dut bertan. Laguntzaile askorekin arituko naiz, baina nire aurkezpen-gutuna izango da.

Zeintzuk arituko dira zurekin?

Nire ibilbidean betidanik aritu direnak eta azken hilabete edo urteetan heldu den jendea. Alde batetik, Elena Martin Eibarko Koro Gazteko (EKG) zuzendari kuttuna dago. Musikaren munduan nire gidaria izan da. Berak piztu zidan musikarekiko eta abestearekiko grina. Gero, Oihane Zabala eta Garazi Aizpurua daude. EKG-n ezagutu nituen eta demaseko harremana dut eurekin. Abesbatzak bigarren familia eman digu, asko batu gaitu. Gainera, Oihanerekin eta Garazirekin ODE taldea sortu genuen orain dela hilabete batzuk, ...eta kitto!-k antolatzen dituen Eibarko Kirol Sarietan aurkeztu genuena. Guretako bakoitzak argi du bakarlari moduan bere ibilbidea egingo duela, baina ekitaldietan, ezkontzetan eta bestelako ospakizunetarako taldeak behar dira eta horrelakoetan aritzeko elkarrekin aritzea hobeto zela ikusi genuelako sortu genuen taldea. Beste alde batetik, Ztandan nirekin ibili zen Leila Askaso ere egongo da Coliseon. Finalera heldu ginen biok eta ordu asko eman ditugu elkarrekin, harreman estua sortuz. Gainera, Ztandako dantzari bi izango dira proiektu berriaren dantza-arduradunak, ikuskizunean dantza egiteaz gain: June Viñas eta Nahir Alkain.

Eszenatokitik kanpo ere laguntza eta babesa jasoko duzu, ezta?

Zentzu horretan demaseko erantzuna jaso dut. Gauza bat egiten badut, guztiz sartzen naiz, hondora arte. Kontu handiz gabiltza, lasaitasunarekin, baina ideia berriak sortzen joan dira eta proiektuan sartzen joan gara. Udalaren laguntza barik proiektuak ezin izango luke aurrera egin, eurek eman dizkidatelako baliabide gehienak (Coliseoa, promozioa...). Gero, lan-talde potoloa gara, oholtza gainean eta hortik kanpo ere. Adibidez, Maitane Camposek argazki pila bat egin ditu. Euskal Herriko punta-puntako artistekin egiten du lan eta harreman polita sortu dugu. Bideoak egiten Iker Cabo kuadrillako laguna ibili da. Mundu horretan hasi da eta bat egin dugu proiektu honetan. Bestalde, espero ez nituen babesleak agertu dira. Batetik, Alzola bezalako erakunde bat proiektuan egotea demaseko oparia da. Gertukoa da eta oso modu aktiboan ari da parte hartzen. Izerdi pila bat botatzen ari gara, beraz, beharrezkoa da hidratatzea! Bestalde, Helmet House beti egon da EGK babeste eta proiektu honetan ere hor dago lehenengo minututik. Atrezzoa eskaini digute, Oihane eta Garazi euren arroparekin joango dira... Gero, Vintage Closet Donostiako dendako jabea Ztandan estilista lanetan aritu zen eta harreman estua sortu zen bion artean. Orduan, eurek jantziko naute ikuskizunerako. Eta azkenik, Pauso-k Dancek ere lagunduko nau, eta Paula Bujanda eta Virginia Gonzalezek dantza egingo dute nirekin. Proiektua Atea Irekiz deitzen da eta ate hori lehenengo aldiz zabaltzen dut, baina ukitu ditudan ate guztiak lehen aldian zabaldu dira eta oso babestuta sentitu naiz. Badakit eurek behar izan nautenean ni ere laguntzeko prest egon naizela eta horrek ekarri du horrelako proiektu batean hain babes sendoa edukitzea. Jon Alonsoren proiektua da ‘Atea irekiz’, baina talde batek eraman du aurrera.

Nolako proiektua izatea gustatuko litzaizuke?

Etorriko den guztiarentzat zabalik dagoen proiektua da. Izen artistikoa Jon Alonso izango da, ezagutzen nauen pertsona batek esaten zidalako ez zuela ezberdintasunik ikusten abeslari moduan igortzen nuenaren eta eszenatokitik kanpoko Jon Alonsoren artean. Horren inguruan asko pentsatu izan dut eta ondorio berdinera iritsi naiz: Jon Alonso artista eta Jon Alonso pertsona berdina da. Ikuskizuna aurkezpen bat da, baina hasi naiz idazten eta abestiak pentsatzen, eta proiektu puntualak heltzen badira (abesti bat kaleratzea, kolaborazioren bat egitea...), taldean komentatuko dugu eta ikusiko dugu proiektuan txertatu ala ez. Gauza batzuk iristen ari dira, ni neu ere aukera berrien bila nabilelako ate joka.

Ateak irekiz!

Hasieratik demaseko metafora izan da. Proiektua lan-taldearen aurrean aurkeztu aurretik diskurtso bat pentsatuta eraman behar nuela pentsatzen nuen, batez ere beraiek ulertzeko hau guztia zer den. Hainbat buelta eman ondoren, Ztandako azken saiora iritsi nintzen eta bertan esaten nuen ibilbide berri bati “atea zabaltzen” ari nintzela. Bi hitz horiek buruan grabatuta geratu zitzaizkidan eta lehengo proiektua hor zela argi ikusi nuen: Atea irekiz.

ODE eta Ztanda aipatu dituzu, orain Atea Irekiz... Hilabete biziak izan dira?

Ztandak demaseko biharamun emozionala eta fisikoa laga zizkidan. Hamar aste izan ziren guztira eta aste horietan nire bizitzaren gai bakarra izan zen, baina nire bizitzak aurrera jarraitzen zuen (lanak, familiak, lagunak, arazo pertsonalek...). ODE, bestalde, Ztanda aurretik genuen hitz eginda, irailean hasi behar ginen promozioarekin eta aurkezpenarekin, baina Ztandan sartu nintzen eta atzeratzea erabaki genuen. Ztanda eta gero bi aste behar izan nituen normaltasunera bueltatzeko, estresa kentzeko eta bizitakoa kudeatzeko. ODE aurkeztea demaseko arnasketa momentua izan zen. Egun polita izan zen, jende politarekin, eta zuen babesarekin bikain sentitu ginen. Gero, beste gauza batzuk heldu dira. Euskaraldia martxan jarriko da eta Hamaikakoaren parte izango naiz. Hasieratik hartu nuen konpromisoa neure burua beti euskaraz aurkezteko, argi dudalako hemen mugitu eta euskara babestu nahi dudala. Gainera, Euskaraldiaren aldetik aukera batzuk daude musikarekin lotuta eta joango zarete ikusten zer ateratzen den. Azkenik, mundu artistiko hau beti dago castingei, ahoz-ahokoari eta abarrei lotuta, eta oso zabalik nago heltzen den guztiari. Oso momentu betean nago eta bizitza kudeatzea zaila da, baina lortzen nabil.

Nola daramazu artista izateaz gain hori guztia kudeatzea?

Jendeak esan izan dit agian horrelako gauzak egiten lagunduko didan norbait beharko nukeela (artisten irudiaz, kudeaketaz, castingez... arduratzen den jendea). Izan ere, musikaz gain, antzerki munduarekin ere eduki dut harreman eta beti eduki dut antzerki grina piztuta, orain are gehiago. Bide horretan ere aukerak sortzen ari dira, baina nire moduan asko daude eta heltzea beste kontu bat da.

Bizi izandako guzti honek nola uste duzu lagundu dizula artista moduan?

Beti eduki dut gaur egun artista moduan igortzen dudana. Etxean ispilu aurrean edo sukaldean beti aritu nai antzera. Beti defendatu naiz abesterakoan, dantzatzerakoan edo antzezterakoan. Zaletasun moduan hartu izan dut, eta nahiz eta pentsatu izan dudan horretan lan egitea zoragarria izango litzatekeela, badakit zaila dela eta jende asko dagoela. Era berean, uste dut Euskal Herrian aukera handiak ditugula. Gero eta ekoiztetxe gehiago dago, EiTB formatu berriak proposatzen ari da eta orain dela urte batzuekin alderatuta, gauzak hobeto daude. Bestalde, musikan beti dago konpetentzia edo lehia, izena duten artistak beste posizio batetan daude eta besteok borrokan gabiltza. Ztandan sartu nintzenetik, urduritasun puntu batekin bizi izan nituen aste horiek eta, artista eta pertsona moduan berdin jarduten baduzu, hau da, ez baduzu bestelako paperik egiten, egunerokotasunean zama guztia daramazu gainean eta denbora guztian zaude lanean, ez duzu deskonektatzen. Zentzu horretan neure buruarekin lehian nago, hori hobeto kudeatzen saiatuz. Gauzak bilatzen ari naiz, baina nire eskuragarritasuna mugatua da. Izan ere, gaur egun beste ogibide bat daukat, gradu amaierako lana egiten ari naiz, bizitza soziala edukitzea gustatzen zait... Beraz, zaila da.

Batzuetan ondo abestea edo aktuatzea ez da nahikoa izaten artista bezala bidea egiteko?

Telebistako esperientzia horretan zera ikusi nuen: ondo abestu behar dela, baina agian hori dela gutxienekoa. Itxura fisikoa, hitz egiteko gaitasuna, karisma... Casting edo abesteko programa batera heltzen zarenean (printzipioz, abestera eta zure alde artistikoa baloratzen dena), gauza asko baloratzen direla eta telebista dela ikusten duzu. Hori da Ztandatik daramadan balorazio garrantzitsuena. Gero, mundu errealera irteten zara eta zuk erabakitzen duzu zer erakutsi eta zer ez, edo zertan garrantzia jarri eta zer azpimarratu. Atea Irekiz proiektuarekin hasieratik eduki dut argi zein irudi eman nahi nuen, ez bakarrik nirea, baizik eta proiektuarena bere osotasunean. Ikusiko duzue tipografia eta irudi orokorra nahiko minimalista dela (letra finak, irudia ere...), eta den-dena zainduta dago zerbait zentzuzkoa izateko, niri gustatzen zaidan bezala.

Bide berri horretan zein ate irekitzea gustatuko litzaizuke?

Zaila da erantzutea. Esperientzia berriak bizitzea gustatzen zait, baina hori modu batean edo bestean kudeatu behar den zerbait da. Telebistako esperientzia bizi izan dut, reality edo talent show bat bizitzea, eta orain gauza sinpleagoetara zabalik nago. Adibidez, neure burua bilatzera, neure musika nondik eramatera begiratzera, norekin sortu nahi dudan... Inspirazioa bilatzeko orduan argi dut inguruko jendearekin nahikoa dudala, baina beti heltzen da jende berria. Bestalde, esan bezala, beti eduki dut lotura estua antzerki munduarekin eta antzezlanen edo telesailen bat iristen bada, ni pozik. Eta musika eta antzerkia nahasten duen zerbait heltzen bada, demasekoa izango litzateke!