Lanbide Heziketako ikasleek 410 Ikasenpresa aurkeztuko dituzte biharko azokan

XIV. Ikasenpresa Azoka egingo da bihar Eibarren, Untzagan eta Txaltxa Zelaian ipini dituzten karpetan. Lanbide Heziketako ikasleek 410 ikasenpresa aurkeztuko dituzte 10:00etatik 13:00era bitartean egingo den azokan, eta EAE-ko 50 Lanbide Heziketa zentruetatik etorriko diren bi mila bat ikasle eta 102 irakasle elkartuko ditu Eibarren ekimen honek. Eusko Jaurlaritzako Hezkuntza Sailaren "ITLENT" Euskadiko Lanbide Heziketako Talentuaren Euskal Institutuak antolatu du Ikasenpresa Azoka, Eibarko Udalaren laguntzarekin, eta aurreko astean egindako aurkezpenean nabarmendu zutenez, “Ikasenpresa hauek klasean ikasten ari diren lanbide-arloekin lotuta egongo dira, beti ere pertsonen edo haien ingurunearen bizi-kalitatea hobetzera bideratuta”. Horietako batzuk azaldu zituzten aurkezpenera joandako ikasleek.