Bihar hasiko dira Sanmiguelak ospatzen Aginaga auzoan

Bihar hasiko dira Sanmiguelak ospatzen Aginaga auzoan
2019/09/27 eta kitto!
Asteburu honetan hasiko dira Aginagako jaiak. Bihar zapatua, San Miguel bezpera dela eta, 18:00etan kanpaiak irauliko dituzte. Eta domekan, San Miguel egunean, 11:00etan meza ospatuko dute ermitan, Usartza txistulari taldekoek lagunduta. Eguerdian, berriz, luntxa eta umeendako jolasak hasiko dira eta 14:30ean paella-jana egingo dute. Eta arratsaldean, 17:00etatik aurrera, erromeria egongo da, Mirari eta Aintzane trikitilariek alaituta. Sanmiguelak ospatzeko prestatu duten programak, baina, hurrengo asteburuan jarraituko du: urriaren 5ean (zapatuan), briska txapelketa (17:00etan), umeendako jolasak eta txokolate-jana (18:00etan), Ixua jatetxean afaria (urriaren 3rako izena eman behar da, 943701292 telefono zenbakira deituta) eta 23:00etan hasiko den erromeria, Puro Relajo taldearekin egingo dira. Eta hurrengo egunean, berriz, meza eta hamarretakoa (11:00etan), Gorixoren abereak (12:30ean) eta oparien zozketa (14:00etan).