Errugbiko emakumezkoen taldea mailaz igo daiteke domekan

Errugbiko emakumezkoen taldea mailaz igo daiteke domekan
ETA KITTO 2019, Ots 08

Orain arte jokatutako partidu guztiak irabazita, Euskal Ligako fasea amaituko dute etzi Avia Eibar Rugbykoek Gasteizen; garaipen berri batek 2. B Mailan jokatzeko aukera emango die, martxoan eta apirilean ligan. Gizonezkoen taldeak Uribealdea talde indartsua hartuko du Unben egun eta ordu berean (domekan, 12:00etan).
Foballean, Eibarrek Sevillan izango du hitzordua domekan, 18:30ean, emakumezkoen talde nagusiak asteburu honetan atseden hartuko duen bitartean. Vitoria filialak neurketa zaila du, Racing liderra bisitatuko baitu etzi 17:00etan. Erregional Ohorezko mailako Eibar liderrak, bestalde, Añorgaren bisita jasoko du bihar 18:00etan.
Eskubaloian, 1. Nazional mailako Somos Eibarrek Uharteren kantxa bisitatuko du bihar arratsaldean. Senior mailako beste bi taldeek, bestalde, Ipurua kiroldegian jokatuko dute asteburu honetan, horiek ere bihar: emakumezkoen Eibar Eskubaloiak Munttarpe hartuko du 16:45ean eta Haritzak Labarra Pulpo 18:30ean.
Saskibaloian, Avia Eibar Saskibaloia bisitari izango dugu bigarrenez jarraian, oraingoan Mondragon Unibertsitateari aurre egiteko (domekan, 16:00etan). Ipuruan kadete eta mini mailetako partiduak izango dira etzi goizean.
Waterpoloan, Euskal Herriko 1. Mailako partiduetan, senior talde biek Irunen Bidasoa XXI izango dute zain bihar: emakumezkoen partidua 18:30ean hasiko da eta gizonezkoena 19:45ena.
Pilota arloan, afizionatu mailako neurketa interesgarriak izango dira gaur Astelenan, 19:00etatik aurrera, Eibarko Klub Deportiboko ordezkariekin.

ASTEBURUKO KIROL AGENDA OSOA ikusgai

Gaiarekin zerikusia duten albisteak

« »