Atzoko bertso jaialdian banatu ziren San Andres Bertso Paper lehiaketako sariak Coliseo antzokian

Atzo arratsaldean egin zen …eta kitto! Euskara Elkarteak antolatutako XXVII. San Andres Bertso Jaialdia Coliseo antzokian. Jaialdiaren aurretik, baina, San Andres Bertso Paper lehiaketako sariak banatu ziren: Helduen mailan Euskal Herri osoko 14 lan jaso ditu elkarteak eta, lehen aldiz, egile bakarrak eraman ditu bi sariak, lehiaketara aurkeztutako bi bertso sortarekin: Ekaitz Goikoetxea Asurabarrena beasaindarra izan da irabazlea. Eta Eibarko ikasleen mailan, berriz, Mogel ikastolako 6. mailako bi ikasle saritu ditu epai-mahaiak: Izaro Urkiaga eta Ibai Zubizarreta de Miguel. Irabazleek saritutako bertsoak abestu zituzten eta jarraian hasi zen bertso jaialdia Jesus Mari Irazu, Miren Artetxe, Eñaut Martikorena eta Onintza Enbeita bertsolariekin. Gai-jartzailea Jon Mikel Mujika izan zen.